सिल्वर पापलेट झाला आता महाराष्ट्राचा ‘राज्य मासा’ प्रजातीचे जतन करण्याच्या दृष्टीने होणार उपाय योजना

 

मुंबई ।महाराष्ट्राचा राज्य प्राणी शेकरु आहे तर राज्य पक्षी हरियाल आहे. हे तर सर्वच जण जाणतात. मात्र, आता राज्य मासा म्हणून खवय्यांच्या ताटात महत्त्वाचं मान मिळवणार्‍या एका माशाला दर्जा मिळणार आहे. महाराष्ट्र राज्य सरकारने सोमवारी ही घोषणा केली आहे. खोल समुद्रात मिळणारा रुपेरी पापलेट मासा आता राज्य मासा म्हणून ओळखला जाणार आहे.

 

मत्स्य व्यवसाय मंत्री सुधीर मुनगंटीवार यांनी ही घोषणा केली आहे. गेल्या कित्येक वषारपासून पापलेट माशाला राज्य मासा म्हणून अधिकृत दर्जा मिळावा यासाठी मागणी केली जात होती. अनेक मच्छिमार संस्थानी मत्स्य व्यवसाय मंत्र्यांकडे यासंबंधित मागणी केली होती. अखेर ही मागणी मान्य झाल्याने मच्छिमारांनी समाधान व्ये केले आहे. राज्यात सिल्व्हर पॉम्फ्रेटच्या उत्पादनात होत असणारी घट ही चिंताजनक आहे. त्यामुळं या प्रजातीचे जतन करण्याच्या दृष्टीने मच्छिमार संघटनांनी ही मागणी उचलून धरली होती. राज्य सरकारने या मत्स्य प्रजातीचे महत्त्व जाणून टपाल तिकिटही जारी केले आहे.

 

माशाला अधिकृत राज्य माशाचा दर्जा मिळाल्यानंतर या प्रजातीच्या अधिवासाचे संरक्षण होण्यास मदत मिळेल, अशी भावना मच्छिमारांकडून व्ये करण्यात येत आहे. सिल्व्हर पॉम्पलेटचा स्थानिक पातळीवर पापलेट किंवा सरंगा या नावानेही ओळखले जाते. राज्यात सर्वात जास्त निर्यात पापलेट या माशाची केली जाते. मात्र, 1980 पासून त्याचे उत्पादन घट होत जात आहे. त्यामुळं हा मासा दुर्मिळ होत चालला आहे. हा मासा मोठ्या प्रमाणात सापडतो.

 

ताजा असलेला हा मासा काहीसा सफेद किंवा सिल्वर दिसतो. शिवाय, आकाराने मोठं असलेलं पापलेट हे लहान पापलेटपेक्षा चवीला देखील उत्तम असते. त्यामुळे त्याला बाजारात मोठी मागणी असून त्यातून आर्थिक उलाढाल देखील मोठ्या प्रमाणात होते. या सिल्वर पापलेटच्या जमेच्या बाजू आहेत. सध्या लहान आकाराचे सिल्वर पापलेट पकडण्याचे प्रमाण देखील वाढताना दिसत आहे. त्यामुळे राज्य सरकारच्या या निर्णयामुळे सिल्वर पापलेटच्या संवर्धनाला चालना मिळेल अशी आशा आहे.