अर्धे घर त्याच्या अंगावर होते, तरीही त्याने कुटंबातील ६ जणांना वाचवले ; बचावलेल्या तरुणाचा थरारक अनुभव

 

खालापूर | दिवसभर मुसळधार पाऊस होता.. रात्री लवकरच जेवून इरसालवाडी झोपी गेली. काही झोपण्याच्या तयारीत होते. इतक्यात बाहेर जोरदार आवाज झाला. काही समजायच्या आत घराचा एक भाग त्याच्या अंगावर कोसळला. तो जखमी झाला, पण त्याही स्थितीत त्याने घरातील सहाजणांना घराबाहेर काढून जीव वाचवला. पण एका भावाला तो वाचवू शकला नाही. मोहन पारधी हा प्रत्यक्षदर्शी रायगड टाइम्स कडे आप बिती कथन करत होता.

 

मोहन तुकाराम पारधी हा त्याच्या कुटुंबीयांसह इरसालवाडीवर राहत होता. पत्नी तुलसी, मुलगी भानुष्री वडील तुकाराम, आई दुर्गी, भाऊ रवींद्र आणि सुदाम असे सात सदस्य असलेले हे कुटुंब बुधवारी रात्री झोपी गेले. डोंगराच्या कुशीत राहणार्‍या मोहनच काय, इरसालवाडीतील कोणाच्याही मनात कुठलीच शंका किंवा भीती न्हवती. रात्रीचे साडे दहा, अकरा वाजले असतील. बाहेर जोरदार आवाज झाला. मोहनच्या घराचा काही भाग त्याच्या अंगावर कोसळला, तो घाबरला. पण त्याही परिस्थितीत त्याने आई, वडील, पत्नी आणि लहान मुलगीला घरा बाहेर काढले.

 

घरातील सहा सदस्य सुखरूप होते पण १८ वर्षांचा त्याचा लहान भाऊ सुदाम पारधी ढिगार्‍याखाली गाडला गेला होता. तो घरातील दुसर्‍या खोलीत झोपला होता. त्याला बाहेर काढणे शक्य झाले नाही, असे मोहन सांगतो. त्यामुळे आहेत त्या कुटुंबीयांसह रात्रीच मोहनने खाली उतरत नानिवली वाडी गाठली. या दरम्यान आपल्या आसपास काय घडते आहे याचा अंदाज मोहनला त्या रात्रीच्या अंधारात आला नाही. मात्र काही तरी भयंकर घडले आहे त्याची याला जाणीव होती. तो घाबरला होता. त्याचे एक सवंगडी, गावकरी अजूनही ढिगार्‍याखाली अडकले होते.