पेणः भूमिगत वीज वाहिन्यांचे काम रखडले

 

पेण । इंटीग्रेटेड पॉवर डीस्ट्रीब्युशन स्कीम अंतर्गत पेण शहरासाठी भुमिगत वीज वाहिन्या टाकण्याचे काम हाती घेण्यात आले होते. मात्र 8 वर्षानंतरही या योजनेची काम पुर्ण होऊ शकलेले नाही. पेण नगरपालिका प्रशासन आणि महावितरणयांच्यात समन्वय नसल्याने हे काम रखडले आहे. एकूण 33 किलोमीटर पैकी अजूनही 16 किलोमीटरचे काम बाकी आहे.

 

इंटीग्रेटेड पॉवर डिस्ट्रीब्यूशन योजने आंतर्गत राज्यातील 254 शहरात भुमिगत वीज वाहिन्या टाकण्याचे काम हाती घेण्यात आले होते. 2016 साली यासाठी 2300 कोटी रुपयांचा निधी मंजूर करण्यात आला होता. यात पेण शहरासाठी 6 कोटी रुपये मंजूर करण्यात आले होते. नगर परिषदेच्या हद्दीच 33 किलोमीटरच्या भुमिगत वीज वाहीन्या टाकण्यात येणार होत्या.

 

यापैकी 17 किलोमीटरचे काम पूर्ण झाले आहे. तर उर्वरीत 16 किलोमीटरचे काम गेली 8 वर्षानंतर ही रखडलेले आहे. नगर परिषदेच्या हद्दीत रस्त्यांचे खोदकाम करावे लागणार आहे. यासाठी पेण नगरपरिषदेनी 4 कोटी 18 लाख रुपयांची मागणी केली आहे. हे खर्च महावितरणला परवडणारा नाही. त्यामुळे योजनेचे भविष्य अडचणीत आले आहे.

 

शहरात डिस्ट्रीब्यूशन लॉसेस कमी व्हावेत आणि अखंडीत वीज पुरवठा करता यावा हा या योजने मागचा मुळचा उद्देश होता. पण काम रखडल्याने हा उद्देश साध्यच होऊ शकला नाही. 30 महिन्यात हे काम पूर्ण होणे अपेक्षित असतांना, आठ वर्षांनंतरही काम पूर्ण होऊ शकलेले नाही. यासंदर्भात पेण येथील हरीश बेकावडे यांनी महिती महावितरण कडे मागितली होती.

 

ज्यात आत्ता पर्यंत 5 कोटी 85 लाख रूपये खर्च झाल्याची माहिती देण्यात आली आहे. त्यामुळे जे काम पूर्ण झाले आहे, तेथील भूमिगत वीज वाहीन्या कार्यान्वित करण्याची मागणी बेकावडे यांनी केली आहे. ज्यामुळे सतत वीज पुरवठा खंडित होण्याचे प्रकार कमी होऊ शकतील असा आशावाद त्यांनी व्यक्त केला आहे.