श्रीवर्धन-म्हसळ्यात खतांचा तुटवडा

 

 

दांडगुरी | रायगड जिल्ह्यातील श्रीवर्धन व म्हसळा तालुक्यात खरीप हंगामातील पेरणी झाल्यानंतर पिके ऐन बहरलेल्या अवस्थेत आहेत.पिकांना सध्या खतांची आवश्यकता असताना ऐन हंगमातच शेतकर्‍यांना खतांच्या टंचाईला सोमोरे जावे लागत आहे. मागणी केलेली खते मिळत नाहीत, मागणी करूनदेखील कंपन्यांकडून खाते मिळत नसल्यामुळे शेतकरी त्रस्त झाले असून शेतकर्‍यांची अडवणूक होत असल्याचे चित्र समोर येत आहे.

 

श्रीवर्धन व म्हसळा तालुक्यात मोठ्या प्रमाणात भात शेतीची लागवड केली जाते. मात्र, यावर्षी मोठ्या प्रमाणात रासायनिक खतांचा तुटवडा जाणवत आहे. रासानिक खत नसल्यामुळे पिकांची वाढ खुंटली आहे. शेतकर्‍यांना अपेक्षित असलेली खते मिळत नसल्याची स्थिती कायम आहे. अनेक भागात शेतकर्‍यांना युरियाचा तुटवडा आजही जाणवत आहे.

 

इतरही अनेक खते मागणीनुसार मिळत नसल्याचे शेतकरी सांगतात. येत्या आठ दिवसांत खतांचा पुरवठा नाही झाल्यास खरीप पिकांचे प्रचंड नुकसान होईल, अशी भीती शेतकर्‍यांनी व्यक्त केली आहे.