मुंबई-गोवा महामार्गावर खड्डयांचे साम्राज्य

 

 

 

अलिबाग | मुंबई गोवा महामार्गाची सध्या मोठ्या प्रमाणात दुरवस्था झाली आहे. महामार्गावर ठिकठिकाणी भरमसाठ खड्डे पडले आहेत, हे खड्डे भरण्यासाठी खडी आणि मातीच्या भराव केला जात आहे. त्यामुळे महामार्गावर धुळीचे साम्राज्य पसरले

आहे. त्यामुळे प्रवासी आणि वाहनचालकांनी प्रचंड त्रास सहन करावा लागत आहेत.

 

पावसाळा सुरु झाला की मुंबई गोवा महामार्गावर खड्ड्यांचे अवतारकार्य सुरु होते. हे अवतारकार्य डिसेंबर महिन्यापर्यंत सुरु राहते. गणेशोत्सवाच्या सुरवातीलामहामार्गाच्या दुरवस्थेचा विषय चर्चेत येतो. गल्लीपासून दिल्लीपर्यंत महामार्गाच्या परिस्थितीची चर्चा रंगते. पहाणी दौरे आणि आढावा बैठका होतात. थातूरमातूर दुरुस्ती केली जाते. मात्र पुन्हा पाऊस आला की चेहर्‍याचा मेकअप उतरावा तशी परिस्थिती महामार्गाची होते. खड्डयांचे आदळत आपटत, धूळीतून वाट काढत कोकणवासियांचा प्रवास सुरुच रहातो. गेली नऊ वर्षे थोड्या फार फरकाने हिच परिस्थिती कायम आहे. पळस्पे ते इंदापूर महामार्गाच्या चौपदरीकरणाचे काम २०११ मध्ये सुरु झाले.

 

हे काम २०१४ मध्ये पूर्ण होण अपेक्षित होते. मात्र २०२१ चा उत्तरार्ध सुरु झाला तरी हे काम पुर्ण होण्याची चिन्ह दिसत नाहीत. इंदापूर ते कशेडी दरम्यानच्या दुसर्‍या टप्प्यातील कामाची परिस्थिती फारशी चांगली नाही. महामार्गाची आजची परिस्थिती दयनीय आहे. गडब ते इंदापूरदरम्यान महामार्गावर खड्यांचे साम्राज्य पसरले आहे. माणगाव ते महाड दरम्यानच्या रस्त्यांची अवस्था दयनीय आहे. त्यामुळे वाहनचालकांना गाड्या चालवतांना तारेवरची कसरत करावी लागते. रस्त्यांवरील खड्डे दुरुस्तीसाठी खडी आणि मातीचा वापर केला जात आहे. यामुळे महामार्गावर धुळीचे साम्राज्य पसरले आहे. महत्वाची गोष्ट म्हणजे या खड्यामुळे अपघातांचे प्रमाणही मोठ्या प्रमाणात वाढले आहे. महामार्गाची तातडीने दुरुस्ती करा आणि रखडलेली कामे मार्गी लावा अशी मागणी केली जात आहे.

 

----------------------------------------------------------------

 

------------------------------------------------------------------

 

-------------------------------------------------------------------

 

----------------------------------------------------------------------