रायगडकरांना मिळणार घरबसल्या डॉक्टरांकडून मोफत सल्ला

 

अलिबाग । सध्याच्या कोरोना काळामध्ये घरी राहणे अत्यंत आवश्यक आहे. अशा स्थितीमध्ये जर कुणालाही डॉक्टरांचा सल्ला घ्यायचा असेल तर? अशा लोकांना आता घरबसल्या डॉक्टरांकडून मोफत सल्ला घेता येणार आहे. याकरिता शासनातर्फे ‘ई-संजीवनी ओ.पी.डी.’ ही ऑनलाईन सेवा सुरु करण्यात आली आहे.

 

ई-संजीवनी ओ.पी.डी. (https://esanjeevaniopd.in/) अ‍ॅपद्वारे आता डॉक्टरांसोबत मोफत सल्लामसलत करता येणार आहे. अगदी रविवारी आणि इतर सुट्टीच्या दिवशीही ही सेवा उपलब्ध असणार आहे. या सेवेचा लाभ घेणार्‍या रुग्णांना एस.एम.एस.द्वारे ई-प्रिस्क्रीप्शनही प्राप्त होते. ते दाखवून रुग्ण नजीकच्या सरकारी रुग्णालयातून औषधे घेऊ शकतात.

 

ही सेवा अत्यंत लाभदायी असल्याने, जास्तीत जास्त रायगडकरांनी ‘ई-संजीवनी ओपीडी’ अ‍ॅप डाऊनलोड करुन या सेवेचा लाभ घ्यावा, असे आवाहन रायगडच्या जिल्हाधिकारी निधी चौधरी व जिल्हा शल्यचिकित्सक डॉ.सुहास माने यांनी केले आहे.