कर्जत : मोरेवाडी, ताडवाडी तहानलेली....

 

कर्जत । तालुक्यातील पाथरज ग्रामपंचायतीमधील मोरेवाडी आणि ताडवाडी या आदिवासी वाडीमधील लोकांची पिण्याच्या पाण्यासाठी पायपीट सुरु झाली आहे. येथील महिलांना पाण्यासाठी मातीच्या बंधार्‍यावर जावे लागत असल्याने आदिवासी महिलांना पुरुषांची मदत घ्यावी लागत आहे. त्यामुळे येथील आदिवासी लोकांचा रोजगारही बुडत आहे.

 

कर्जत तालुका हा आदिवासीबहुल तालुका म्हणून ओळखला जातो. या तालुक्यामध्ये आदिवासी लोकवस्ती मोठ्या प्रमाणात दुर्गम भागात राहत आहे; पण या आदिवासी लोकांच्या पिण्याच्या पाण्याचा प्रश्न अनेक वर्षांनंतरही सुटू शकलेला नाही. पाथरज ग्रामपंचायतीमधील ताडवाडी आणि मोरेवाडी या आदिवाडीत एकूण 900 लोकसंख्या असेलल्या आदिवासी वाड्या आहे.

या वाड्यांना पिण्याच्या पाण्यासाठी जो साठा आहे, तो दोन महिने पुरेल एवढाच उपलब्ध आहे. त्यामुळे या वाड्यांमधील आदिवासी महिलांना पिण्याचे पाणी आणण्यासाठी वणवण करावी लागणार आहे. या वाडीमधील महिलांना पावसाळा संपताच गावंडवाडीच्या मातीच्या धरणावर जावे लागत आहे.

 

मातीचा बंधारा हा मोरेवाडीपासून किमान दीड किमी अंतरावर असून येऊन जाऊन या आदिवासी महिलांना तीन किलोमीटरचा फेरा मारावा लागत आहे. वाडीमध्ये नळपाणी योजनेचे भूमीपूजन झाले असून त्या नळपाणी योजनेत पिण्याच्या पाण्याची जलवाहिनी ताडवाडीपासून पुढे आणण्यात आली आहे. मात्र या जलवाहिनीचा फायदा अन्य लोकांनी घेतला असल्याने आदिवासी ग्रामस्थ संतप्त झाले आहेत. या आदिवासी वाडीमध्ये दोनवेळा भूमिपूजन करण्यात आले; पण या आदिवासी वाडीत पाईपलाईन पोचली नाही. या आदिवासी वाड्यांमधील लोकवस्तीकडे शासनाने लक्ष घालावे, अशी मागणी महिला ग्रामस्थ विमल आगीवले यांनी केली आहे.

 

ताडवाडी आणि मोरेवाडी या आदिवासी वाड्यांबाबत शासनाची सुरु असलेली उदासीनता यामुळे हे आदिवासी नाराज आहे. चार वर्षांपूर्वी नळपाणी योजना मंजूर आहे, पण ती पाणीपुरवठा योजना पूर्ण होण्याचे नाव घेत नाही. ताडवाडीमधील आदिवासी लोकांसाठी दोन विहिरी आहेत; पण मोरेवाडीसाठी तशी कोणतीही व्यवस्था नाही. त्यामुळे या वाडीमधील महिलांना गावंडवाडी येथील मातीच्या बंधार्‍यावर जावे लागत आहे, ही समस्या नळपाणी योजना झाल्याशिवाय पूर्ण होणार नाही.

 

वाडीसाठी मंजूर असलेली नळपाणी योजना कागदावर आहे. ती पूर्ण व्हावी यासाठी लवकरच कर्जत विधानसभा मतदारसंघाचे आमदार महेंद्र थोरवे यांनी योजना पूर्ण करण्याचे ओशासन दिले आहे. वाडीमधील कार्यकर्ते सुरेश दरवडा यांनी त्यासाठी आमदारांकडे पाठपुरावा सुरु केला आहे.