मुरुड : लक्ष्मीखार येथे घराला आग; घराचे मोठे नुकसान
Total Views |
दोन तासांनी आग नियंत्रणात आणण्यात यश
सुधीर नाझरे/मुरुड-जंजिरा । मुरुड शहरातील लक्ष्मीखार येथील काशिनाथ महादेव बैकर यांच्या राहत्या घराला आज पहाटे 3 वाजण्याच्या सुमारास अचानक आग लागली. घराच्या छपरासह माळ्यावरील लाकडी फळ्यांनी पेट घेतल्याने, या आगीत असंख्य जीवनावश्यक वस्तूंचे नुकसान झाले आहे.
घराला आग लागल्याचे निदर्शनास आल्यानंतर, बैकर कुटुंबियांनी शेजारी राहणार्‍या लोकांना जागे करत, मदत मागितली. शेजार्‍यांनी प्रसंगावधान राखत, घरातील पाण्याने आग विझवण्याचे प्रयत्न सुरु केले. तब्बल दोन तासांच्या अथक प्रयत्नांनंतर ही आग आटोक्यात आली. या परिसरात घरे जवळजवळ असल्याने, इतर घरेही आगीच्या भक्ष्यस्थानी सापडण्याची भीती होती. मात्र वेळीच आग नियंत्रणात आल्याने पुढील अनर्थ टळला. या गडबडीत काही जागरुक नागरिकांनी सर्वप्रथम गॅस सिलेंडर बाहेर काढल्याने मोठी हानी टळली.